फिशिंग ईमेल्सबाबत सातत्याने जनगाजृती केली जात असली तरी अशा बोगस मेलला तब्बल 45 टक्के नेटीझन्स बळी पडत असल्याचं गूगलच्या एका पाहणीतून पुढे आलंय. म्हणजेच कितीही अलर्ट देऊन नेटीझन्सला सावध करण्याचा प्रयत्न केला तरी फिशिंग मेल्स हे फसवणुकीचं प्रभावी साधन बनत असल्याचं स्पष्ट होतंय, असंही गूगलने स्पष्ट केलंय.
फिशिंग काय आहे ?
फिशिंग मेल म्हणजे नेटीझन्सची महत्वाची माहिती हॅक करण्यासाठी टाकलेला सापळा. अनेकदा तुमच्या ओळखीच्या असलेल्या नावाने किंवा तुम्ही सेवा घेत असलेल्याच्या नावाने असे फिशिंग मेल पाठवले जातात. अनेकदा बड्या आणि लोकप्रिय ब्रँड असलेल्या बहुराष्ट्रीय कंपन्यांच्या नावाचा समावेश त्यासाठी केला जातो.
या फिशिंग मेलच्या माध्यमातून तुमचं बँक अकाऊंट, त्याचा पासवर्ड किंवा अन्य महत्वाची माहिती गोळा केली जाते, ही महत्वाची आणि गोपनीय माहिती हस्तगत झाली की त्याचा वापर करून तुमच्या पैशांवर डल्ला मारला जातो. ही फसवणूक झाल्याचं लक्षात येतं, तोपर्यंत खूप उशीर झालेला असतो.
फिशिंग मेलविषयी अलीकडच्या काळात बरंच लिहिलं आणि वाचलं जात असल्यामुळे अशा फिशिंग मेलला बळी पडणाऱ्यांची संख्या फार नसावी, असं मानलं जात असावं. मात्र गूगलच्या ऑनलाईन सर्वेक्षणातून पुढे आलेल्या माहितीने सर्वांनाच आश्चर्यचकित केलंय. कारण अशा फिशिंग मेलला बळी पडणारांची संख्या ही तब्बल 45 टक्क्यांच्या घरात जाते.
फिशिंगच्या माध्यमातून एखाद्या नेटीझन्सची गुप्त आणि व्यक्तिगत माहिती एकदा हॅकर्सच्या हाती लागली की तीस मिनिटांच्या आतच हॅकर्स या माहितीचा वापर करतात, असंही गूगलच्या सर्वेक्षणात पुढे आलंय.
आपल्या gmail अकाऊंट फिशिंग होण्यापासून टाळण्यासाठी द्वीस्तरीय व्हेरीफिकेशन वापरावं, असं आवाहनही गूगलकडून करण्यात आलंय. द्वीस्तरीय व्हेरीफिकेशनमुळे फक्त पासवर्ड असून भागत नाही, तर प्रत्येक लॉग-इनसाठी गूगलकडून तुमच्या मोबाईलवर एसएमएसच्या माध्यमातून एक डिजीटल कोडही पाठवला जातो. तो मॅच झाल्यानंतरच तुम्हाला आपलं अकाऊंट वाढवता येतो, असंही गूगलने स्पष्ट केलंय.
0 comments:
Post a Comment